المقدمة‫

• ليه لحد دلوقتي مفيش منصة تواصل إجتماعي عربية من الناحية التقنية و الإدارية

• ليه مش حنقدر نعمل منصة تواصل إجتماعي زي تويتر أو فيسبوك أو تيكتوك

• إيه الحلول البديلة و الخطوات اللي يمكن إتخاذها - تحديات الحلول دي

‫ الsocial media platform بتخزن نوعين من الداتا

1. Content Data ‫

2. Metrics and Logs

‫ الContent Data هو المحتوى اللي مستخدمي المنصة بيخلقوه و ده أكل عيش المنصة عشان لو المحتوى كويس ف المستخدمين حيقعدوا وقت أكتر على التطبيق و ناس جديدة تستعمله. الداتا بتاعة المحتوى بتبقى كتابة أو صور أو فيديو و طبعًا كل جودةالميديا أعلى كل ما تخزينه حيبقى مكلف. ف لازم يكون بنية تحتية أو Infrastructre عشان تقدر تخزن و تقدم المحتوى ده. سعادتك و انت بتقرأ الثريد ده, بتبعت ريكويست لسرفر من سيرفرات تويتر و فيه Content Delivery Network CDN بتديلك الثريد لو موجود على Edge Server قريب من مكانك و لازم يكون للسيرفرات دي باندويدث عالي عشان يستحمل عدد المستخدمين ..

إزاي المنصات بتقيس نجاحها

‫ تويتر مثلا بيجيله عالاقل 100 ألف ريكويست ف الثانية ف لازم ترجع الداتا بسرعة او ب latency قليلة. المقياس اللي بيقيس نجاح فيسبوك, تويتر, إلخ هو حاجة اسمها Monthly Active User (MAU) عدد المستخدمين للمنصة ف الشهر و كل ما زاد الرقم كل ما بقى أحسن عشان دي ناس أكتر بتتعرض لإعلانات مخصصّة عشانك ف معلنيين حيحبوا يشتروا يأجروا بانر من الصفحة او ناس بتدفع اشتراك للمنصة زي تويتر.

‫ طيب ازاي تعرف ده؟ محتاج تاتبع عدد المستخدمين و أماكنهم فين (كل ما كان مستخدمينك ف بلد ذا قوى شرائية أعلى كل ما كان أحسن) و بيقعدوا قد ايه و لو فيه bugs و 5000 الاف حاجة تانية. و ده محتاج Dashboards زي Datadog و Graphana. ربنا كرمنا عدد مستخدمين عالي حنحتاج اننا نscale و نكبر عشان نستوعب العدد ده. محتاجين معلنين يدونا فلوس ندفع تمن السيرفرات و البنية التحتية بتاعة الcloud computing أكبر شركات بتقدم الPlatform as a service و Infrastructure as a service هما Azure, AWS, GCP يليهم Oracle و IBM و Alibaba Cloud حنحتاج برضه مراقبين أو Content moderation عشان يتأكدوا من ان مفيش محتوى مريض زي فيديوهات اغتصاب و تعذيب او مواد اباحيةو ده اللي حصل ل Google+ في آخر أيامه :

الحلول الحالية غير واقعية

ف احنا كده محتاجين: ‫

1. ناس أغنياء يحطوا اعلانات عندنا ف المنصة و لو محتوى المنصة قدم حاجات تتعارض مع توجهات الناس الأغنياء حيسحبوا فلوسهم و نفلسه ‫

2. اللي حنتعضرلها كل يوم طبقة حماية من الDDOS attacks ‫

3. طرق جديدة اننا نجذب انتباه المستخدمين و نعلي ال engagement & retention

‫

4. بنية تحتية تقدر تستوعب عدد المستخدمين و لو محتوى المنصة تعارض مع الحكومة اللي علي أراضيها ال ‫ data centers of the cloud provider .. من حق الحكومة تطلب من ال cloud provider تقفل السيرفرات عننا ف الويبسايت يقع (أكتر من 60% شركات أمريكية و الباقى صينية و لا يٌعتمد قوي)

‫ 5. محتاجين نحطه على Apple Store/Google Play for Cross-Platform Compatibility و الاتنين مملوكين لشركات أمريكية ممكن يشيلوا التطبيق بمزاجهم .. و لما الحكومة ضيقت الخناق على هواوي الصينية إضطرت الأخيرة لخلق app store خاص بيها

‫ طبعًا فيه حاجات تانية زي محتاجين محللي بيانات عشان نتابع ال user data و نعرف ازاي نحسن من المنصة و ناس تشتغل customer suppor عشان لو تم اختراق حسابات المستخدمين و مبرمجين لتطوير خواريزميات صريحة و واضحة

‫ ف طبعًا عزيزتي القارئة أكيد إستنتجتي ان تقريبًا مستحيل خلق social media platform عربية خالصة في المناخ الحالي لأن لو حنطور كل البنية التحتية بإيدينا بدلا من الإستعانة ب cloud providers ف ده حيحتاج سنين و تمويل أكبر.

و لو المنصة حتبقى بإشتراك زي نيتفلكس ف المستخدمين مش حيصبروا على مشاكل تقنية كتيرة و منتج على نص سوا (و حقهم .. دافعين فلوس ف خدمة متاحة لهم "بالمجان" ف منصات تانية)

لكن الغرض ان أي حد بيسعى ف الموضوع يمكن استعمال هذا الثريد ك نقطة بداية لتفادي حوائط سد في المستقبل و اسثمار الوقت و المجهود بشكل ذكي.

خلاص عرفنا ان 90% من الأدوات مكلفة جدًا و احنا لا نملكها بل بنأجرها من شركات غير عربية يسهل التأثير عليها و غلق منصتنا .. ايه الحل؟

‫ من وجهة نظري اللي تحتمل الخطأ قبل الصواب هو ال Peer-to-Peer (P2P) Networking

‫ الP2P بيبقى المستخدم بيلعب دور الكلاينت و السيرفر في نفس الوقت بدلًا من ان يكون عندنا سيرفر مركزي هو اللي بيقدم ال content المشتكرين ف النتوورك يقدروا يقدموا المتحوى و يستهلكوه

‫ في شبكة الP2P ال peers او المشتركين بيتواصلوا مع بعض على طول منغير سيرفر في النص عشان يتبادلوا المعلومات .. و بدل ما يكون المحتوى أو الملف كله متخزن في مكان واحد .. يتقطع كذا حتة chunks في أماكن مختلفة ف الشبكة عبر المستخدمين

‫ الTorrent Protool /BitTorrent بيشتغل على كذا مرحلة:

1. Torrent link /Magnet link: ‫ لما بنبتدي نحمل فيلم من على التورينت بنحتاج .torrent file/magnet link دول بيحتووا على metadata عن الفيلم اللي عايزين ننزله (حجمه قد ايه .. اسماء ال chunks و معلومات عن ال trackers

2. trackers: ‫ و دول سيرفرات (أيوة برضه حنتحتاج سيرفرات لكن مش بالكم المهوول) بيحتووا على معلومات ل peers عندهم ال file chunks عشان يوصل البيير اللي عايز ينزل الفيلم بال peers اللي عندهم اجزاء من الفيلم

3. swarms: ‫ لما ال tracker بيوصلك .. بتنضم لمجموعة من البييرز اللى عندهم الفيلم .. المجموعة دي اسمها swarm

4. Seeding : ‫ بعد ما بنحمل الفيلم بنقدر اننا نرفع أجزاء منه لبييرز تانيين حيحتاجوه في المستقبل و حنتحط على الليستة بتاعة ال trackers

‫ ميزة ال P2P انه لامركزي و ان كل ما ناس تانية اشتركت ف ال network كل ما ال scalability زادت و ال redudancy اتحسنت عشان الملف بيتخزن عند ناس كتير في جميع أنحاء العالم و كمان التورينت بيتسعمل ال bandwidth المتاح من كل ال peers بدل ما يكون عندنا سيرفر مركزي عليه الحمل كله

لو حنيجي نطبق ده على شبكة تواصل إجتماعي ف حنحتاج كذا حاجة:

‫

1. شبكة متداخلة او Mesh network و ده نوع من ال network topology ميبقاش فيه تسلسل هرمي بشكل فعّال عشان يعمل routing لل requests

‫ 2. بروتوكول للP2P عشان يقدر يوفر المحتوى سواء كتابة او صور او فيديوهات

‫ و أحسن واحد من وجهة نظري هو Secure Scuttlebutt او SSB و ده قصته جت من مخترعه (دومينك تار) كان عايش على قارب و مفيش internet connection يٌعتمد عليه ف إهتم ان يبقى فيه gossip protocol للsocial media ‫ كلمة scuttlebutt بتٌستخدم بين البحارة لما يكون فيه اشاعة و كلام كتير ‫ اما بالنسبة للmessaging protocols ف WebRTC اختصارًا ل Web Real-Time Communications بيوفر ده بس بيحتاج سيرفرات للrelays و الsession handling

‫ 3. الwebsite registering ده مقدور عليه زي ما الأتراك عملوا في 2017 لما أردوغان منع ويكيبيديا راحوا حطوا النسخة التركي على InterPlanetary File System, or IPFS و ده P2P protocol بيroute على حسب الداتا مش على الserver الأصلي زي ما بيحصل ف الclient-server architecture

‫ الIPFS (شايفك ياللي بتقول بيستعملوه ف البلوكشاين) بيعتمد على حاجة اسمها CID او Content Identifier CID .. لما الداتا بتتقسم بيcompute الhash بتاعها مع الcodec و بيعرف على اساس ده ي route الrequest

‫ طيب .. عملنا الويبسايت p2p و المستخدم حيساعد في نجاح المنصة و نقدر نقول و ننشر اللي عايزنه و المحتوى محتوانا و المكان مكانا و الفضاء فضائنا و مش حنعمل app دلوقتي عشان ممكن يتشال من الapp stores بسهولة. ‫ حنلم الليلة و نحتفل؟ للأسف صعب بسبب كلمة واحدة: Latency

‫ البشر عبر العصور بيقل صبرهم و بيستعجلوا أكتر .. سرعات النت زمان لما كانت بتبقى 50Kb/s كنا بنقف تبجيلاً و إحترامًا للmodem. ‫ منصات التواصل الإجتماعي بتعين UX researchers متخصصين ف ازاي يضيفوا features جديدة تخلي دماغك تفرز دوبامين و تنبسط و تقضي وقت أكتر على الapp ‫ الناس دي بيدفعلها فلوس كتير عشان مش بيكونوا بس Graphic designers لأ هما بيكونوا دارسين بيزنيس و علم نفس و بيعملوا تجارب على كذا تصميم و يجمعوا آراء المستخدمين لحد ما يطلعوا بحاجة تخلينا مدمنين للمنصة بتاعتهم و طبعًا كل ما الlatency (الوقت اللي بياخده السيرفر عشان يرد عالrequest)

‫ كانت اقل كل ما كان افضل. أول مشكلة بتواجه أي social media app جديد هي: إزاي نجذب المستخدمين؟ ازاي نقنعهم يقضوا وقت عندنا. ‫ عشان كده زوكربيرج الحيوان عمل تصرف رائع لما أطلقوا Threads و قال أي حد عنده instagram يقدر يعمل اكونت على ثريدز على طول و الfollowers بتوعه حيلاقيهم هناك ‫ و لو حبيت تشيل اكونتك من على ثريدز يبقى تشيل اكونتك من على IG .. عشان كده بعد او شهرين من إطلاق Threads الMAU وقع ف الحضيض لأن الناس محبتوهوش و حسوا انهم مجبرين عليه ‫ معظم نجاح منصات التواصل الاجتماعي جت من شلة صغيرة و شباب مبتكر بعدين شركات كبرى و رجال اعمال استحوذوا عليها:

‫المنصات و الإبداع الرأسمالي

1. فيسبوك أصلًا فكرته مسروقة من كاميرون وينكليفوس و تايلر وينكليفوس و مارك حاول يمنع ظهور فيلم The Social network ‫

2. إنتسجرام ف الأول بدأ انك لما تروح مكان .. تعمل check in و تقول انت فين و تحط صورة .. بعدين لقوا انه شبهFourSqaure ف عملوا pivot و قالوا image sharing app

‫ و كانوا اول من اخترعوا فكرة الهاشتاج على الصور و لما قربوا على 50 MAU فيسبوك اشترتهم ببليون دولار ‫ 3. تطبيق Vine اللي نفس فكرة تيكتوك تويتر اشتروه و مطورهوش ‫ 4. علوان الحيوان اشترى تويتر بدل ما يعمل تطبيق تاني زي Truth social بتاع دونالد ترامب عشان تويتر الريدي عليه مستخدمين

و اللستة تطول أكتر. ‫ الP2P بطيء للغاية و تجربة المستخدم مش حتبقى سلسلة و جميلة زي ما هي ف الClient/Server الحالية و حيبقى صعب للغاية إقناع الناس انها تسيب المنصات اللي هما معتادين عليها الا في حالة واحدة: ‫ إن المنصات دي تطردهم و ميبقاش قدامهم حل غير المنصة العربية الP2P

‫ تجربة المنصات الP2P مش جديدة ف عندنا Manyverse اللي ف السويد و اللي بيعتمد على الSSB protocol بالمناسبة ‫ manyver.se ‫ و عندنا Hyphanet اللي هو اصلًا منصة لخلق منصات تواصل إجتماعي عبر الP2P ‫ و عندنا minds اللي هو نسخة من تويتر و Mastodon عشان عاشقي البلوكشاين

‫ لكنهم مش مشهورين .. و مفيش MAU و مفيش تمويل كافي و الأهم مفيش رغبة من المستخدمين. ‫ مش غرضي اكون انهزامي لكن التغيير يبدأ مننا و من تضحية المستخدمين و قبولهم بتجربة UX أسوأ و أبطأ في مقابل منصة مستقلة و حرة و ممولة من المشتركين لأن التطوع حيبقى كافي ف البداية لكن مش مستدام.

أتمنى أكون جاوبت على الأسئلة المطروحة في أذهان الناس .. كل الحظ و التوفيق لكل من سيسعى في هذا الطريق و أتمنى بالفعل تحقيق ده يومًا ما في المستقبل القريب.

و أرجو اللي وصل لنهاية الثريد و قادر على التبرع لأهالينا بفلسطين و السودان يقوم بده و يدعيلهم

المصادر:

wiki.p2pfoundation.net/P2P_Web_Hosting hyphanet.org/index.html en.wikipedia.org/wiki/Gossip_protocol… observer.com/2017/05/turkey-wikipedia-ipfs… stackoverflow.com/questions/737560/why-is-p..… docs.ipfs.tech/concepts computer.howstuffworks.com/bittorrent.htm